სსიპ ილიას სახელმწიფო უნივერსიტეტში შიდა და გარე მობილობა რეგულირდება საქართველოს განათლებისა და მეცნიერების მინისტრის 2010 წლის 4 თებერვლის N10/ნ ბრძანებითა და უნივერსიტეტის აკადემიური საბჭოს 2015 წლის 16 ივნისის N7 სხდომაზე დამტკიცებული ილიას სახელმწიფო უნივერსიტეტში სტუდენტის/პროფესიული სტუდენტის სტატუსის მარეგულირებელი წესით.

გარე მობილობა

სტუდენტთა მობილობის პროცესის ადმინისტრირებისათვის შექმნილია მობილობის ელექტრონული პორტალი (students.emis.ge), რომლის მეშვეობით ერთი უმაღლესი საგანმანათლებლო დაწესებულებიდან სხვა უმაღლეს საგანმანათლებლო დაწესებულებაში სტუდენტთა გადასვლის პროცესის ადმინისტრირებას ახორციელებს სსიპ – განათლების მართვის საინფორმაციო სისტემა. ელექტრონული პორტალის მეშვეობით ხორციელდება შემდეგი პროცესები:

• უმაღლესი საგანმანათლებლო დაწესებულებების მიერ მობილობის გამოცხადება, პორტალზე საგანმანათლებლო პროგრამებისა და ამ პროგრამებზე მისაღები ადგილების რაოდენობის, ასევე დაშვების წინაპირობების განთავსების გზით.
• სტუდენტთა რეგისტრაცია მობილობის უფლებით სარგებლობის მიზნით და მათ მიერ მობილობის განაცხადის გაკეთება შესაბამისი უმაღლესი საგანმანათლებლო პროგრამის არჩევის გზით;
• მობილობის შედეგების გამოცხადება, რომლის საფუძველზე სტუდენტს უფლება აქვს ჩარიცხვის მოთხოვნით მიმართოს იმ უმაღლეს საგანმანათლებლო დაწესებულებას, სადაც მოიპოვებს მობილობის უფლებას.

   იმ პირთა ერთიანი სია, რომლებმაც მოიპოვეს ილიას სახელმწიფო უნივერსიტეტის შესაბამისი ფაკულტეტის/სკოლის საგანმანათლებლო პროგრამებზე მობილობის უფლება ქვეყნდება განათლების მართვის საინფორმაციო სისტემის ელექტრონულ პორტალზე, რის შემდეგაც მობილობის მსურველი უფლებამოსილია, განცხადებით მიმართოს უნივერსიტეტს ჩარიცხვის თაობაზე. განცხადებას თან უნდა ერთვოდეს საგანმანათლებლო დოკუმენტი, რომლის საფუძველზეც პირი ჩაირიცხა დაწესებულებაში, სასწავლო ბარათი და სტუდენტის პირად საქმეში არსებული სხვა დოკუმენტაციის ასლები, ასევე რექტორის ბრძანებით განსაზღვრული დოკუმენტები. მობილობის მსურველი, რომელიც უნივერსიტეტის მიერ დადგენილ ვადაში განცხადებით არ მიმართავს მას, კარგავს აღნიშნულ ფაკულტეტზე/სკოლაში ან საგანმანათლებლო პროგრამაზე ჩარიცხვის უფლებას, გარდა კანონმდებლობით გათვალისწინებული შემთხვევებისა.

   მობილობის მსურველი პირის განცხადების მიღების შემდეგ უნივერსიტეტის ფაკულტეტი/სკოლა რექტორის ბრძანებით განსაზღვრულ ვადებში ადგენს მის მიერ შეთავაზებულ საგანმანათლებლო პროგრამებთან მობილობის მსურველი პირის მიერ სხვა საგანმანათლებლო პროგრამის ფარგლებში მიღწეული სწავლის შედეგების თავსებადობას, იღებს გადაწყვეტილებას შესაბამისი კრედიტების აღიარების შესახებ  და ატყობინებს მობილობის მსურველს. მობილობის მსურველის მიერ ფაკულტეტის/სკოლის შესაბამისი საგანმანთლებლო პროგრამაზე სწავლის გაგრძელების შესახებ წერილობითი თანხმობის, კრედიტების აღიარების დასკვნაზე ხელმოწერისა და შესაბამისი ხელშეკრულების გაფორმების საფუძველზე უნივერსიტეტის ფაკულტეტი/სკოლა ამ პირთა სიასა და აღიარებული კრედიტების შესახებ ინფორმაციას წარუდგენს რექტორს ბრძანების პროექტის მოსამზადებლად და გამოსაცემად.

  უნივერსიტეტი  შეიმუშავებს სამართლებრივი აქტის პროექტს სტუდენტის მობილობით ჩარიცხვის თაობაზე და პროექტსა და მასთან დაკავშირებულ ინფორმაციას, განათლების მართვის სისტემის უფროსის ინდივიდუალური ადმინისტრაციულ-სამართლებრივი აქტით დადგენილი ფორმის შესაბამისად, ასახავს განათლების მართვის საინფორმაციო სისტემაში. ბრძანების პროექტზე მართვის სისტემის დადებითი დასკვნის მიღების შემდეგ, შემოდგომის სემესტრისთვის არაუგვიანეს 1 ოქტომბრისა, ხოლო გაზაფხულის სემესტრისთვის არაუგვიანეს 1 მარტისა, გამოიცემა ბრძანება სტუდენტის მობილობით ჩარიცხვის შესახებ. 

   უნივერსიტეტს უფლება აქვს გასაუბრების, გამოცდის ან სხვა კრიტერიუმის საფუძველზე დაადგინოს მობილობის მსურველის ცოდნისა და უნარების საგანმანათლებლო პროგრამასთან თავსებადობა. ამ თავსებადობის არარსებობა პირის მობილობით ჩარიცხვაზე უარის თქმის საფუძველია.

მნიშვნელოვანი ინფორმაცია:

• გარე მობილობის უფლება სტუდენტს წარმოეშობა უმაღლესი განათლების შესაბამის საფეხურზე სწავლების ერთი წლის შემდეგ. სწავლების პერიოდში არ შედის ის დრო, რომლის განამავლობაშიც პირს შეჩერებული ჰქონდა სტუდენტის სტატუსი;
• მობილობა შესაძლებელია განხორციელდეს უმაღლესი განათლების ერთი საფეხურის ფარგლებში. 
• უმაღლესი განათლების პირველ საფეხურზე 2020 და შემდგომი წლების ერთიანი ეროვნული გამოცდების შედეგების საფუძველზე ჩარიცხულ სტუდენტებს მობილობის უფლება აქვთ, მხოლოდ იმ პროგრამებზე, რომლებსაც შეესაბამება მათ მიერ ერთიან ეროვნულ გამოცდებზე ჩაბარებული სავალდებულო საგანი/საგნები, 
• ბაკალავრიატის საფეხურის სახელოვნებო–შემოქმედებით  საგანმანათლებლო პროგრამაზე მობილობის მსურველს, ელექტრონულ პორტალზე რეგისტრაციის ვადის დასრულებამდე, გავლილი უნდა ჰქონდეს დაწესებულების მიერ დადგენილი კონკურსი.  სახელოვნებო–შემოქმედებითი და სასპორტო საგანმანათლებლო პროგრამის შესახებ ინფორმაცია, ასევე, ამ პროგრამებაზე დაწესებულების მიერ განსაზღვრული კონკურსის ტიპის, ვადების და სხვა წინაპირობების თაობაზე, განთავსებულია მობილობის პორტალზე.

უმაღლესი საგანმანათლებლო დაწესებულება უფლებამოსილია, დაადგინოს დამატებითი მოთხოვნები სტუდენტების მობილობით ჩარიცხვასთან დაკავშირებით (გამოცდა, შემოქმედებითი ტური, გასაუბრება და ა.შ) ან/და შეზღუდოს კონკრეტულ საგანმანათლებლო პროგრამაზე მიღება კონკრეტული პირობით (სწავლების წელი, ათვისებული კრედიტების რაოდენობა და ა.შ.). დამატებითი მოთხოვნები აისახება ელექტრონულ პორტალზე შესაბამისი საგანმანათლებლო პროგრამის შენიშვნების გრაფაში. სტუდენტი ვალდებულია აღნიშნულ მოთხოვნებს გაეცნოს და გაითვალისწინოს.